Saturday, 22 November 2014

Sahmulphah Thla Ni 22, 2014, Issue No. 47

PAGE - 1
TUALCHHUNG :
Damlo : Roluahpuia S/o Zairemthanga Vawmphunga Sec. a mi chu khawsik natna avangin Alpha Hospital Kulikawn-ah enkawl mek a ni.
@@    Pu Lalsanga H/o Pi Zothanpari chu Cancer Hospital Zemabawkah hun engemaw chen enkawl a nih hnuin a lo chhuak leh ta.
@@    Malsawmtluanga S/o C. Zosangzuala Saichhuma Sec. a mi chu hun engemaw chen a\ang tawh khan damdawi inah enkawl a ni a, Nov. ni 20, 2014(ningani) khan thisen Unit thum pek a ni.
@@    Pi Lalsangzuali W/o Lalrimawia (L)  Lalsavunga Sec. a mi chu Pneumonia leh Diabetis natna avangin Alpha Hospitalah hun engemaw chen enkawl a nih hnuin a lo chhuak leh ta.
@@    Lalruatdiki D/o Lalrinsanga Lalsavunga Sec. a mi chu taksa lam harsatna hrang hrang avangin Civil Hospital-ah enkawl mek a ni.
@@    Jimmy Zorintluanga H/o Tanya Lalrinawmi Kapdaia Sec. a mi chu ril tla fual avangin Nov. ni 21, 2014 (zirtawpni) khan Aizawl Hospital-ah zai a ni a, tunah hian damdawi inah enkawl zui mek a ni.

@@    Pi Laldawli Kapdaia Sec. a mi chu Cancer natna avangin a chakvak lova, in lamah enkawl mek a ni.

Nau nei thar: Pu Vanmawia te nupa Lalsavunga Sec. a mi te chuan Referal Hospital, Falkawnah naute mipa duhawm tak an nei thar.

Khiangawi : Lalruatpuii D/o Lalthanpuia Vawmphunga sec a mi chuan Nov. ni 20, 2014(ningni) khan Serchhip lamah khiangawiin a liam ta.

Pêm thar : Heng mite hi Hlimenah an lo pêm thar : Pu Zonunsanga te chhungkua chu Durtlang leitan a\anga lo pêm lutin  Pu Zosangliana (L) te inluahin Damvea Sectionah an awm a. Tin, Pu Lalrinkima te chhungkua chu Chhippui Kawnmawi a\anga lo pêm lut an ni a, Pu Lalhmuchuaka te inluahin Buala Sectionah  an awm a ni.

FRONT :
BRANCH Y.M.A. COMMITTEE THUCHHUAK
    November ni 18, 2014 (Thawhlehni) zan kan YMA Hall-ah Hlimen Branch YMA Committee vawi - 7 na neih a ni a. Thurel tlangpui mipuite hriat atana pawimawh te :-
1. Sum Audit chung chang : Branch sum, Chhiatni Fund leh Section tinte sum hi Audit turin Committee chuan a rel a,a hun atan Dec. ni 5, 2014 (Zirtawpni) zan dar 6:30 YMA Hall ah neih a ni anga, Branch YMA Adviser pahnih Pu Duhthusama leh Pu Pakunga ten an Audit dawn a ni.

2. Thil pek : Pu R.Lalremsanga, Damvea Sec. a mi chuan Arm Chair 40 Branch-ah a rawn hlan a, Branch YMA chuan lawmawm a ti hle.

3. 2015 Branch hruaitu thlan chung chang : Dec. ni 12, 2014 (Zirtawpni) zan dar 6:00 hian YMA Hall-ah kum 2015 Branch hruaitu thlanna hun hman tur a ni anga, inthlan danah hian mi 6 thlanchhuah tur a ni ang. RO atan Pu Duhthusama, Adviser Br. YMA a ni anga. PO turte - Pu Lalhmingliana LCC, Pu R.Lalngheta Ex. Officio, Pu Pakunga Adviser, Pu Vanlalhruaia Vice Chairman LC, Upa Lalengliana Buala Sec., Pu Zonuntluanga Saichhuma Sec., Pi Zonunkimi Pre. MHIP, Upa C.Lalengzauva, Damvea Sec. leh Upa C.Zothanliana Vawmphunga te an ni ang.(Inthlan hun hi \ul bik thilah sawn theih a ni ang.)

4. Venglai kawn chei chung chang : Venglai kawn chei leh nise tih a ni a, hetiang hian Committee bik siam a ni :-
    Chairman    :    Pu Lalhmuchhuaka
    Secretary    :    Tv. Lalkhawmawia
    Treasurer    :    Pu Lalrinmawia
    Members : Pu R.Lalngheta, Pu R.Lal\anpuia, Pu Vanlaltluanga, Pu Robuanga, Pu Lalthantluanga, Tv. R.Lalawmpuia, Pu J.Vanlalbiakdika, Pu H.Zomuanpuia, Pu Laltlankima, Pi Saidingluaii, Nl. Mimi Zohmingmawii leh Nl. Zoremtluangi te an ni.
    Hemi atan hian Section hrang hrangah Budget siam a ni :-
    Saichhuma ` 2500    Buala - ` 2000
    Damvea - ` 2000    Kapdaia - ` 2000
    Vawmphunga - ` 1000    Lalsavunga - ` 500
    Vengchhung chhungtinte hnenah sum hi khawn bawk tur a ni a, Section tinah khawn turin heng mite hi ruat an ni :-
    Buala Sec : Pu Lalhmuchhuaka, Pu R.Lalngheta, Pu Robuanga, Pu Lalvulliana, Pu Zoramhmangaiha
    Damvea Sec. : Section O.B. te
    Kapdaia Sec. : Section O.B. te
    Lalsavunga Sec. : Pu Lal\anzuala leh Pu K.Lalchhuanawma
    Saichhuma Sec. : Pu Lalrinmawia, Tv. R.Lalawmpuia, Pu Vanlalliana, Nl. Lalroliani
    Vawmphunga Sec. : Pu Zolianchhunga leh Pu Lalremthanga.            
 - Phek 4 naah chhunzawm a ni.

PAGE - 2
EDITORIAL :
HUNPUI LO THLENG HI
    Hunpui lothleng hi lawmna ni nge? lungchhiat \ahna ni? Kan hma maiah (upa \awng takin) ban phak lekah Krismas hun hlimawm leh nuam tak mai chu hman nawm loh hlauin kohhran hote leh mitin mai chu mahni phak tawk \heuhin kan inpuahchah a. Pawl ho leh \hian ho angte pawhin programme te pawh lo duanglawkin kan nghakhlel hle hlawm tawh awm e. He hunah hi chuan Kristian chauh pawh nilo Kristianna awmzia pawh hre lemlo te pawhin hlimna ni leh lawmna ni atana hmangin programme hlimawm tak nen uar thei ang berin hman an duh \hin. Zirna lam avangte, eizawnna avangte leh thil dang eng engemaw avanga ram hrana awm kan chhungte chu chah hawin chhungkua a hlim taka Kristmas hman ho dan tur ngaihtuahin kan rilru pawh kan seng \an tawh ngei ang.
    |henkhat tan ve thung chuan he hunpui lo thleng mek hi lungleng a \ah vawng vawngna, lungchhiat avanga mittui tam tak senna hun a tling leh ngei dawn. Chhungkaw kima Kristmas hmang ho ve chak ngawih ngawih, mahse thihna avanga in\hen chhungkua eng emaw zat kan khawtlangah ngei pawh hian an awm ve ngei ang le. Chuvangin, he hunpui Kristmas kan hmuah danah leh kan lawm danah hian chhungtin mai pawh ni lovin mimal leh pawl ho angte, \hian ho angte hian hmuah dan tawkte, hlim dan tawkte thiam a pawimawh. Lusunna avang te leh chhungkaw harsatna avangte emaw damloh tawh avangte a he hun hlim taka hmang ve thei lo te tana phurrit leh mit leh beng kham zawnga awm loh hram a va \ha em. A bik takin \halaite hian hlim dan chu a tawk kan thiam a \ul. He hun Kristmas hlimawm tak puala kan inbuatsaihna leh kan lawm dan te hian nakina kan inchhir lehna tur thil pawi min thlen loh nan; mi tan bengchheng leh ninawm ni lova malsawmna, hlimna thlen thei turin he hunpui hi hmuakin i hmang ang u.

ZIAKTUTE HUANG :
SAKAWLH LEH A CHHINCHHIAHNA
- Rinawma Kawlni.
Kar hmasa a mi  chhunzawmna..........

    Tunlai hian sakawlh hlau ho hian pianthar ringawt a tawk lo, Isua Krista rin ringawt pawh a tawk lo tiin an sawi vak vak \hin a, sakawlh hlau tura an zirtirna ang an zawm loh chuan an him bik dawn lovin an ngai. Heng mite hian pianthar pawh an ngai pawimawh thei lo. Anmahni himna tur an dap a, an dapna lamah midangte an tih\haih ve zel a, hlauhna thlarauin a man a, Isua Krista-ah pawh thlamuang thei lovin an vir chuk a ni ber. Isua krista hi kan neih loh chuan hlauin a chhinchhiahna hi duh lo pawh ni ila, a chhinchhiahna hi kan pu tho tho dawn a ni. (thup 13:8)
    Sakawlh chhinchhiahna hi Bio Chip te, Credit Card, Census a hming ziahte, UID Card etc. tih vel mai mai a ni lo. Pathian nung hnawl a, A aiah sakawlh leh lim nena inthlunzawnna nghet a intukluhna a ni. A bak chu sakawlh thuawihna thiltihin a nghawng chhuak chauh zawk a ni.
    Sakawlh chhinchhiahna lo awm hun tur chu amah a lo inlar hunah a ni ang. A lo lan hun tur chin hriat a nih hma hma a rinthu a lo ral khelh vak vak na hian a tak ni lo, a hlimthla niawm a rin; lo chhaih lawk vel na ang chauh a ni.
    A lo lan hun tur a Pathian remruat hun lah tuman kan hre silo.

********************************************************************

GOSPEL CAMPING
     Nov. ni 21, 2014 (Zirtawpni ) zan dar 6:30 khan Branch YMA Executive Committee in Branch YMA bultum a Gospel Camping buatsaih nise ti a a lo rel tawh chu bawhzuiin  vengchhung kohhran hrang hrang Committee te nen YMA Hall ah Join Committee neih a ni a,  Kohhran hrang hrang Committee te leh Branch YMA O.B, Ex- Officio leh Adviser te nen Gospel Camping neih chung chang hi an sawiho a ni.
    Join Committee chuan Gospel Camping neih ngei nise a ti a, hetiang hian Camping Committee pawh din nghal a ni:
    Chairman    :    Pu R. Lalngheta
    Vice Chairman    :    Pu Lalhmingliana
    Secretary    :    Tv. R. Lalawmpuia
    Asst. Secretary    :    Upa J. Zothanpuia
    Treasurer    :    Pu Lalthantluanga
    Members       :-
Hlimen Presby. Kohhran : Upa Rinngaia, Upa Lalengliana,
    Hlimen Damveng Presby. Kohhran  : Upa H. Vanlaltlana,
                    T. Upa J.K Lalengzauva,
    Hlimen vengthar Presby. Kohhran : Upa Sangzarliana,
                    T. Upa F. Lalrimawia,
    Baptist Kohhran : Upa K. Lalchhuanawma, Upa Laltinkhuma, Isua Krista Kohhran : Upa Lalramdina, Upa H. Lalzuiliana, Salvation Army : Pu Zoramhmangaih(CSM),
        Pu Lal\anzuala(RS),
MHIP : Pi Zonunkimi, Pi Biak\huami,
MUP : Rev. Vanlalvena, Pu Than\huama, leh
Local Council member zawng zawng te an ni.
    Camping hun atan Dec. ni 2 - 14, 2014 a ni anga. Speaker atan Pu Lalramliana, Gospel Thunder Team sawm nise an ti a, Camping na hmun  leh Follow Up na hmun atan Hlimen Presbyterian Kohhran te hmunhma dil tum a ni.
    Camping a a\ul anga hman atan Pu Vanlaltluanga Branch YMA President chuan ` 1000 in hma a hruai a ni.

PAGE - 3
HRIATTIRNA :
Halpuah leh halmawi chungchang
    Mizoram sawrkar chuan kum 2014 Krismas leh kumthar 2015 vuakvetah halpuah leh halmawi zawrh leh hal a khap a. Halpuah leh halmawi te hi mihringte tana \angkaina neilo, hriselna tichhe thei, a lo thlawn a sum tamtak senralna a nih bawk avangin, kum dangah pawh kan lo tih \hin tawh angin Central YMA chuan halpuah leh halmawi zuar lo tur leh hal lo turin mitinte kan in ngen a ni.

Sd/ Vanlalruata,
Gen. Secretary
Central YMA

Electric Bill chung changa ngenna
    Damvea Section ten kan Section huamchhunga sumtuak nan Electric Bill kan khawn \hin chu vengchhungah pekna(counter) a awm tak avangin November thla khan kan khawn ta lova. Amaherawhchu, chhungkaw tamtak a\anga Electric Bill khawn leh tura thurawn kan dawn avangin December thla a\ang hian sumtuak nan kan rawn khawn leh dawn a, chhungtin ten min lo pek tir leh turin kan i ngen a ni e.

Sd/ Secretary
Damvea Section YMA

Branch YMA ngenna
    Kumin 2014 Krismas lawm nan hian Hlimen Venglai kawn chu Branch YMA chuan chei leh nise a ti a, hemi atan hian thawhlawm khawn a ni dawn a, chungtinte tlawmngai a thawhlawm hi mahni phal ang ang lo thawh turin Branch YMA chuan chhungtin te kan ngen che u a ni.

Sd/- Secretary
Hlimen Branch YMA

Local Council hriattirna
    Hunpui kan lo hnaih leh ta hle a, chhungtin ten kan in leh a vel te fai takin vawng ang u. Kawng pui dung te tichep zawng a kan bungrua te dah hnawk lo turin kan in hriattir a. Tin, kan ran vulh;a bikin ui leh ar te thlahdah lo tur leh midang te tana hnawksak lo thei ang ber a enkawl turin kan in hriattir bawk e.
    A bikin ui khawlai a tei mai mai hmuh tur ala awm leh \hin a, khuahkhirh vek turin kan in ngen a, khuahkhirh loh vanga man te chungah action hi lak theih a ni tih kan in hriattir nawn leh e.

Sd/- Lalhmingliana
Chairman, Local Council

LAWRKHAWM :
Lirnghing
    Nov. ni 20, 2014(ningani) zan dar 11:44 a lirnghing khan kan veng pawh a sawi che ve hle a, chhiatna nasa zawk erawh a thlen hriat a ni lo. Veng chhung mi tamtak chuan he lirnghing hi lirnghing an tawn tawh a nasat ber \um niin an sawi hlawm a. Mithiamte chuan lir hi 5.7 Richer Scale a na in a nghing a ni an ti.
   
Hlimen venglai kawn chei leh dawn
     Kumin Krismas leh kumthar denchhenin Venglai kawn chu Branch YMA chuan a chei leh dawn a, Branch OB, Ex-Officio leh Adviser ten ` 1000/- \heuh an ang a, tin, Committee member te ` 200 - ` 1000 inkar chu mahni remchan angin an thawh vek dawn bawk a ni.

Bronze medal hawn
    North East Inter State Badminton Championship Guwahati a khelh zawh takah Tv. Malsawmsanga S/o R. Lalngaihawma Buala Sec. chu Junior Category ah Bronze Madal a dawng a, a hlawhtlinna Hlimkhawpui E.B ten kan lawmpuiin kan chhuang takzet a ni.

Music video release
    Hlimen Damveng Presbyterian Kohhran Naupang  Pathianni chawhnu inkhawm ten hun rei tak a\anga an lo er tawh Haleluiah Chorus Music Video chu Nov. ni 16, 2014( Pathianni) zan inkhawm ban khan an Kohhran Chairman Upa C. Lalengzauva’n a Release a, a Release zawh hian Big Screen ah en nghal a ni a, LPS leh Zonet cable TV ah he Music Video hi pek niin tihchhuah a ni tawh nghe nghe a ni.

Electric hman chung chang
    Fur khua a hulin, thlasik kan lo hmang \an leh ta reng mai. Hetiang hun a lo thlen hian Electric pawh nasa zawkin kan hmangin kan hmang rim zawk fo va, chuvangin, kan Electric hman dan chung changah mitinte i fimkhur zual ang u. Kan Electric Main Switch te hi a hlui deuh tawh avangin Load sang lutukah hian a chhe fo mai a, a spare part te Office lamah lam mai tur a awm rih lova, kan hunpui lai te a a chhiat a hlauhawm thei hle a. Tunah chuan Gas lam te kan zia awm ta bawk a, heater hmang \hin te pawhin loh theih loh te a nih loh chuan hman tawh loh nise, Heater hmang kan tam chuan Main Switch hian a zo lo \hin a. Hunpui a Power Supply a kan buai loh nan mitin ten Power i renchem ang u.

Advertisement........
CL -X & XII exam theih
    Cl. - X & XII MBSE / CBSE Selection a vanduai/tling zo lo te tan Govt. of India Recognised Board hnuaiah 2014 - 2015 Session atan Regular theih a ni ta. 2012 a\angin Aizawl-ah ngei Exam Centre hawn a ni. Mahni puala Exam Centre nei awmchhun kan ni.
Result :    2013 - Cl. X & XII = 100 %
    2014 - Cl. X & XII = 100 %

    Contact :    8257948671
        8413936001
(2-2)        8794090556

PAGE - 4
KEIMAHNI :
Hlimkhawpui Budget
    Hlimkhawpui  2014 Oct.  thla Budget  pe tla tawh te:
1.    Lalsavunga Sec.    2.  Damvea Sec.
3.    Kapdaia Sec.    4.  Buala Sec.

    Lalsavunga Sec. ten  December thla  thleng an tlak ta a, Damvea Sec. ten Nov. thla Budget an pe tla ta bawk.

Buala Section
    Section sumtuak nana inhlawhna min siamsak tu Pu F. Zothankima chungah leh member thawkchhuak te lawmthu kan sawi a, ani hian Property house sak nan chartin a thawh dawn bawk a ni. Tin, Pu Lalramchuana pawhin Property house chhuat chhun nan Cement min tum sak dawn bawk a ni . Pu Lalthanpuia(Mathana) pawhin rawra leh balutam tham tak min tum sak bawk a, kan va lawm em.
    Tin, Local Council ten ringrod \hahnem tak mai min pe bawk a, lawmthu kan sawi bawk a ni. Heng mite bakah Property House sak nan a mi inphal engaw zat an awm niin thu kan dawn bawk. Property House hi tun thla chhung ngei a sak zawh tum a ni.

2015 Branch YMA Nominate
    Dec. ni 12, 2014 (Zirtawpni) zan dar 6:00 hian YMA Hall-ah kum 2015 Branch hruaitu thlanna hun hman tur a ni a, inthlan danah hian mi 6 thlanchhuah tur a ni ang. Heng mite hi Nominate te an ni:
1. F. Zosangzuala( DV)     2. J. Vanlalbiakdika (BS)
3. Lalchhankima (KD)     4. Lalchhantluanga (KD)
5.Lalhmuchhuaka(BS)     6.Lalhmunsiama(VP)
7.Lalkhawmawia(BS)     8.Lallawmkimi(VP)    9.Lallawmzuali(KD)    10. Lalremmawia(LSV)    11. Lalremthanga(VP)    12. Lalrinchhana(KD)    13. Lalrinmawia(SC)    14. Lalroliani(SC)    
15. Lalthantluanga(VP)    16. Lalthlengliana(KD)    17. Laltlanhlua(BS)    18. Lal\anzuala(LSV)
19. Lalvulliana(BS)    20. R. Lalbiakmawia(DV)
21. R. Lal\anpuia(BS)    22. R. Zoliana(SC)    
23. R. Lalawmpuia(SC)    24. R. Lalrindika(BS)  
25. Robuanga(BS)    26. Samson Lalrinfela(LSV)    27. Vanlalliana(SC)    28. Vanlaltluanga(VP)    29. Zairemthanga(VP)    30. Zochuanpuii(VP)
31. Zolianchhunga(VP)    32. Zoramhmangaiha(BS)
    Heng mite bakah hian YMA danbu in a phal angin Floor Nominate mi pathum pawm theih a ni.(Inthlan hun hi \ul bik thilah sawn theih a ni ang.)
 
Damvea Section
    Nov. ni 29, 2014(inrinni) hian Chênkual Picnic Spot, Reiek Road-ah member te intuaitharna hun hman tur a ni a, Member 1 in ` 150 thawh \heuh tur a ni e. Nov. ni 26, 2014 thleng O.B te hnenah pawisa hi thawh theih a ni ang.

   Tun\um Issue buatsaihna ah Pu Lalparmawia Saichhuma Sec. a mi chuan  Arsa a tuihnai tak mai min hlui hlauh mai a, kan puar el awl hle.  Kan va lawm em!!
 
CHHIARTUTE NGAIHDAN :
@@    Local Council in Stone Crusher tihnun hun chung changa felfai taka dan an rawn siam kha a finthlakin a lawmawm kan ti hle a. Tin, Crusher te hi kawngpui ring lo deuha; Melthum tih dan ang deuh hian chhak lamah hian insawn dan awm se, vantlang hriselna atan pawh a thil pawimawh tak a nih avngin min ngaihtuahsak se kan lawm hle ang.
- Brandona Pa

Phek hma chhunzawmna..............    Tin, NGO leh Political Party te hetiang hian sum thawh tura ngen nise tih a ni bawk.
1) MHIP - ` 1000 aia tlem lo. (2) MUP ` 500 (3) Congress Unit ` 2000 (4) MNF Unit ` 1000 (5) Taxi Welfare ` 1000
    Heng thawhlawm khawnte hi Dec. ni 6, 2014 aia tlai lovah Pu Lalrinmawia hnenah khawn tute hian thehluh vek tur a ni. Tin heng baka \ul dang ruahmanna awm thei turte chu Sub-Committee kutah a awm ang.

5. Miharsa \anpui chung chang: Krismas denchhenin vengchhung a miharsa te \anpui nise tih a ni a, Section tin ten mahni huamchhunga \anpui ngai nia hriatte chu Dec. ni 6, 2014 (Inrinni) aia tlai lovah Br. Secretary hnenah thehluh vek tur a ni.

6. Lehkha hmuh : a) In luah hawh dilna : Pu Lallawmkima, Bawngkawn hnen a\angin Thlanmual-I a) MUP In sira Sub-Centre a sak turah hlawhfate awm nan waiting shed hnuaia thlanmual in luah hawh a dilna chu remtihsak a ni a, a luah man leh a hmun hma chung changah OB te nen lo indawr mai se tih a ni.
 b) Siknipui Kut hman rawtna : Hlimen Football Club leh Hlimen Volleyball Club ten Siknipui Kut buatsaih tura Branch YMA an ngenna chu hun a chep deuh tawh a hriat a nih avangin buatsaih hman ni dawn lovin Committee chuan a hria a, tun \um atan chuan tih rih loh mai nise tih a ni.

7. Pêm lehkha: Pu Zonunsanga te chhungkua Durtlang Leitan leh Pu Lalrinkima te chhungkua Chhippui Kawnmawi te hnen a\anga pemlehkha hmuh chu pawmsak a ni.

8. Thingphun samfai chung chang : Samtlang Road, Serlui hnar kam kawng dunga thing phun chu hnimin a bawh nasat tawh avangin Nov. ni 22, 2014 (Inrinni) zing karah Branch Exe. Committee Member te leh Kapdaia Sec. Committee ten samfai hnatlang neih nise tih a ni.

9. Action laksak tura ngenna : Pu C.Lalengzauva, Damvea Sec. a mite in bul kawngpui dunga Basketball khel \hin te hian ti tawh lo tur leh an ban phunte pawh mihringte kan him zawk nan phawitir tura ngenna Local Council ah thlen nise tih a ni.

10. Gospel Camping chung chang: Branch YMA bultum in Gospel Camping buatsaih nise tih rawtna chu sawiho a ni a, vengchhung kohhran hrang hrang Committee te sawmin hemi chung changah hian Branch O.B, Exe Officio leh Adviser te nen Nov. ni 21, 2014 (Zirtawpni zan dar 6:30 ah hemi chung chang hi sawihona neihpui nise tih a ni.

No comments:

Post a Comment